Ներածություն

Բանկային համակարգը պատմականորեն ձևավորվել է փոխատվական կապիտալի գործունեության ընթացքում: Վաղ ‎ֆեոդալիզմի պայմաններում փոխատվություն էր տրվում գրավի առկայության պայմաններում:  Դա իրականացվում էր անհատի կողմից և լատիներեն կոչվում էր բանկո կամ դրամափոխի սեղան: Հետագայում փոխատվական պահախուցը ստացավ բանկ անվանումը, որը միջազգային գործածություն ստացավ, իսկ ժամանակակից բանկը իր ‎ֆունկցիաների հետ միաժամանակ իրականացնում է նաև բոլոր տիպի ձեռնարկություններին բնորոշ գործառնություններ: Այն ավանդները ընդունելու և վարկերի տրամադրելու գործարքներին համատեղ իրականացնում է նաև խորհրդատվություն, տեղեկատվություն, առևտրական և միջնորդական տարբեր գործարքներ: Բանկը մի ձեռնարկություն է, որը կենտրոնացնում է սուբյեկտների ժամանակավորապես ազատ դրամական միջոցները, տրամադրում է վարկեր իր հաճախորդներին որոշակի սկզբունքներով:  

Շուկայական տնտեսության անցումային փուլում յուրաքանչյուր պետության տնտեսությունը չի կարող զարգանալ ու կատարելագործվել առանց վարկային ու բանկային կայուն համակարգերի, քանի որ ողջ տնտեսական համակարգը մի կողմից շաղկապված է վարկային ու բանկային համակարգերի հետ, իսկ մյուս կողմից դրանք փոխադարձաբար պայմանավորում են մեկը մյուսին:

Անհրաժեշտ է նաև նշել, որ բանկերը փոխանակության ոլորտի սուբյեկտներ են, միջնորդ կազմակերպություններ: Այսինքն՝ բանկը մի դեպքում հանդես է գալիս որպես վարկատու, իսկ մյուս դեպքում՝ որպես վարկառու: